ಶ್ರೀ ಸಾಯಿ ರುದ್ರಾಧ್ಯಾಯ ಸಂಗೀತ ಕಥೆಯ ಹರಿಕಾರ ಬಹುಮುಖ ಪ್ರತಿಭೆಯ ಸಾಯಿ ಬಂಧು - ಶ್ರೀ.ನರೇಂದ್ರ ಸುಧಾಕರ ರಾವ್ ನಾಶಿರಕರ್ - ಕೃಪೆ: ಸಾಯಿಅಮೃತಧಾರಾ.ಕಾಂ 

ಶ್ರೀ.ನರೇಂದ್ರ ಸುಧಾಕರ ರಾವ್ ನಾಶಿರಕರ್ ರವರು ಬಹುಮುಖ ಪ್ರತಿಭೆಯುಳ್ಳ ಸಾಯಿ ಬಂಧು. ಇವರು ಪ್ರಖ್ಯಾತ ಸಾಯಿಭಜನ ಗಾಯಕರು, ಬರಹಗಾರರು, ಆಂಕರ್, ಪ್ರವಚನಕಾರರು, ಸಂಗೀತ ಸಂಯೋಜಕರು, ಕವಿಗಳು ಹಾಗೂ ಸಮಾಜ ಸೇವಕರು. ಇವರನ್ನು ಹತ್ತಿರದಿಂದ ಬಲ್ಲ ಸಾಯಿಬಂಧುಗಳು ಹಾಗೂ ಸ್ನೇಹಿತರು ಇವರನ್ನು "ಸಾಯಿ ಸ್ನೇಹಿ" ಎಂಬ ಹೆಸರಿನಿಂದ ಕರೆಯುವ ವಾಡಿಕೆಯಿದೆ. ಇವರು ಮಹಾರಾಷ್ಟ್ರದಾದ್ಯಂತ ತಮ್ಮ "ಶ್ರೀ ಸಾಯಿ ರುದ್ರಾಧ್ಯಾಯ ಸಂಗೀತ ಕಥೆ" ಯ ಮುಖಾಂತರ ಮನೆ ಮಾತಾಗಿದ್ದಾರೆ.

ಇವರು 19ನೇ ಅಕ್ಟೋಬರ್ 1964 ರಂದು ಖ್ಯಾತ ಸಾಯಿ ಮಹಾಭಕ್ತರಾದ ಹರಿ ಸೀತಾರಾಮ ದೀಕ್ಷಿತ್ ಆಲಿಯಾಸ್ ಕಾಕಾ ಸಾಹೇಬ್ ದೀಕ್ಷಿತ್ ರವರ ಹುಟ್ಟೂರಾದ ಮಹಾರಾಷ್ಟ್ರದ ವಾರ್ದಾ ಜಿಲ್ಲೆಯ ಹಿಂಗನಘಾಟ್ ಪಟ್ಟಣದಲ್ಲಿ ಜನಿಸಿದರು. ಇವರ ತಾಯಿ ಶ್ರೀಮತಿ.ರಜನಿ ಸುಧಾಕರ ರಾವ್ ನಾಶಿರಕರ್ ಹಾಗೂ ತಂದೆ ದಿವಂಗತ ಶ್ರೀ.ಸುಧಾಕರ ರಾವ್ ನಾಶಿರಕರ್.

ಇವರು ಬಿ.ಎಸ್.ಸಿ ಪದವೀಧರರು. ಅಲ್ಲದೇ ಕಂಪ್ಯೂಟರ್ ಆಪರೇಟರ್ ಮತ್ತು ಪ್ರೋಗ್ರಾಮರ್ ನಲ್ಲಿ ಡಿಪ್ಲೋಮಾವನ್ನು ಕೂಡ ಗಳಿಸಿದ್ದಾರೆ.

ಇವರು ಮಹಾರಾಷ್ಟ್ರ ಸರ್ಕಾರದ ಆರೋಗ್ಯ ಇಲಾಖೆಯಲ್ಲಿ ಹಿರಿಯ ಗುಮಾಸ್ತರಾಗಿ ಸೇವೆಯನ್ನು ಸಲ್ಲಿಸುತ್ತಿದ್ದಾರೆ. ಇವರು ಸಮಾಜ ಸೇವಕರಾಗಿ ನಿಷೇಧಿತ ಔಷಧಿಗಳ ವಿರುದ್ಧ ಅದರಲ್ಲೂ ವಿಶೇಷವಾಗಿ ಗುಟ್ಕಾ ಹಾಗೂ ಮಾವಾಗಳ ವಿರುದ್ಧ ನಿರಂತರ ಹೋರಾಟ ಹಾಗೂ ಚಳುವಳಿಗಳನ್ನು ನಡೆಸುತ್ತಾ ತಮಗಿರುವ ಸಾಮಾಜಿಕ ಕಳಕಳಿಯನ್ನು ವ್ಯಕ್ತಪಡಿಸಿದ್ದಾರೆ. ಮಹಾರಾಷ್ಟ್ರದಾದ್ಯಂತ ಸೈಕಲ್ ಮೇಲೆ ಸುಮಾರು 5000 ಕಿಲೋಮೀಟರ್ ಗಳಿಗೂ ಹೆಚ್ಚು ದೂರವನ್ನು ಕ್ರಮಿಸುತ್ತಾ ಗುಟ್ಕಾ ವಿರೋಧಿ ಚಳುವಳಿ ಹಾಗೂ ಆರೋಗ್ಯ ಜಾಗೃತಿ ಕಾರ್ಯಕ್ರಮಗಳನ್ನು ಯಶಸ್ವಿಯಾಗಿ ಆಯೋಜಿಸಿದ್ದಾರೆ.

ಇವರು "ಮಿಷನ್ ಶ್ರೀ ಸಾಯಿರುದ್ರ, ನಾಗಪುರ" ಎಂಬ ಸಂಸ್ಥೆಯನ್ನು ಹುಟ್ಟುಹಾಕಿ ಧೂಪಖೇಡಾದ ಸಾಯಿಧಾಮ್ ಆಶ್ರಮದ ಸ್ವಾಮಿ ಬಲದೇವಜಿ ಭಾರತಿ ಅವರ ಮಾರ್ಗದರ್ಶನದಂತೆ ಸಾಯಿಬಾಬಾರವರ ಜೀವನ ಹಾಗೂ ತತ್ವಗಳನ್ನು ಪ್ರಚಾರ ಮಾಡುವ ಉತ್ತಮ ಕಾರ್ಯವನ್ನು ಕೈಗೊಂಡಿದ್ದಾರೆ.

 ಮಿಷನ್ ಶ್ರೀ ಸಾಯಿರುದ್ರ, ನಾಗಪುರದ ಉದ್ದೇಶ:

ಶಿರಡಿ ಸಾಯಿಬಾಬಾ ಸಂಸ್ಥಾನ ಪ್ರಕಟಣೆ ಮಾಡಿರುವ ಪವಿತ್ರ "ಶ್ರೀ ಸಾಯಿ ಸಚ್ಚರಿತ್ರೆ" ಯನ್ನು ಆಧರಿಸಿ ಸಾಯಿಬಾಬಾರವರ ಜೀವನ ಹಾಗೂ ತತ್ವಗಳನ್ನು ಪ್ರಚಾರ ಮಾಡುವ ಉದ್ದೇಶವನ್ನು ಮಿಷನ್ ಶ್ರೀ ಸಾಯಿರುದ್ರ, ನಾಗಪುರ ಹೊಂದಿರುತ್ತದೆ. ಈ ಉದ್ದೇಶಕ್ಕಾಗಿ ಶ್ರೀ ನರೇಂದ್ರ ನಾಶಿರಕರ್ ರವರು "ಶ್ರೀ ಸಾಯಿ ರುದ್ರಾಧ್ಯಾಯ" ವೆಂದು ಕರೆಯಲ್ಪಡುವ ಶ್ರೀ ಸಾಯಿ ಸಚ್ಚರಿತ್ರೆಯ 11ನೇ ಅಧ್ಯಾಯವನ್ನು ಸಂಗೀತ ಕಥೆಯ ಮುಖಾಂತರ ಸಾಯಿ ಭಕ್ತರಿಗೆ ತಲುಪಿಸುವ ಅತ್ಯುತ್ತಮ ಕೆಲಸವನ್ನು ಮಾಡುತ್ತಿದ್ದಾರೆ. ಶಿರಡಿ ಸಾಯಿಬಾಬಾ ಸಂಸ್ಥಾನದವರು ಶ್ರೀ ಸಾಯಿ ಸಚ್ಚರಿತ್ರೆಯ 11ನೇ ಅಧ್ಯಾಯವನ್ನು ಪ್ರತ್ಯೇಕವಾಗಿ ಪ್ರಕಟಣೆ ಮಾಡುತ್ತಾ ಬಂದಿದ್ದಾರೆ. ಆದ ಕಾರಣ ಈ ಅಧ್ಯಾಯದ ಮಹತ್ವ ಮಹತ್ತರವಾದುದು ಎಂದು ನಮಗೆ ತಿಳಿದುಬರುತ್ತದೆ. ಈ ಅಧ್ಯಾಯದಲ್ಲಿ ಸಾಯಿಬಾಬಾರವರು ಹನ್ನೊಂದು ಅಭಿವಚನವನ್ನು ಉಚ್ಚರಿಸಿರುವುದೇ ಅಲ್ಲದೇ ಇನ್ನೂ ಅನೇಕ ಅಭಿವಚನಗಳನ್ನು ಉಚ್ಚರಿಸಿದ್ದಾರೆ. ಆದುದರಿಂದ ಶ್ರೀ ಸಾಯಿ ಸಚ್ಚರಿತೆಯ 11ನೇ ಅಧ್ಯಾಯಕ್ಕೆ ಅತಿ ಹೆಚ್ಚಿನ ಮಹತ್ವವಿರುತ್ತದೆ. ಮಿಷನ್ ಶ್ರೀ ಸಾಯಿರುದ್ರ, ನಾಗಪುರವು ಈ ಹನ್ನೊಂದನೇ ಅಧ್ಯಾಯವನ್ನು ಮರಾಠಿ ಹಾಗೂ ಹಿಂದಿ ಭಾಷೆಗಳಲ್ಲಿ ಮುದ್ರಿಸಿ ಆಸಕ್ತಿಯುಳ್ಳ ಸಾಯಿ ಭಕ್ತರಿಗೆ ಉಚಿತವಾಗಿ ಹಂಚುವ ಕೆಲಸವನ್ನು ಮಾಡುತ್ತಿದೆ. ಸಾಯಿಬಾಬಾರವರ ಜೀವನ ಹಾಗೂ ತತ್ವಗಳನ್ನು ಪ್ರಚಾರ ಮಾಡುವ ಮುಖಾಂತರ ಜನರಲ್ಲಿ ನಂಬಿಕೆ, ಶಾಂತಿ ಹಾಗೂ ಸಾಮಾಜಿಕ ಸೌಹಾರ್ದತೆಯನ್ನು ಪ್ರಪಂಚದಾದ್ಯಂತ ಹರಡಬಹುದು ಎಂಬ ದೃಢ ನಂಬಿಕೆಯನ್ನು ಮಿಷನ್ ಶ್ರೀ ಸಾಯಿರುದ್ರ, ನಾಗಪುರ ಹೊಂದಿದೆ.

ಶ್ರೀ ಸಾಯಿ ಸಚ್ಚರಿತ್ರೆಯ 11ನೇ ಅಧ್ಯಾಯದಲ್ಲಿ ಶಿರಡಿ ಸಾಯಿಬಾಬಾರವರು ನುಡಿದಿರುವ ಕೆಲವು ಅಭಿವಚನಗಳು ಈ ಕೆಳಕಂಡಂತೆ ಇವೆ:

ಓವಿ 150 - "ಯಾರು ಸಂಪೂರ್ಣ ನಂಬಿಕೆ ಮತ್ತು ಭಕ್ತಿಯಿಂದ ಗಮನವಿಟ್ಟು ಈ ಅಧ್ಯಾಯವನ್ನು ಪ್ರತಿನಿತ್ಯ ಪಾರಾಯಣ ಮಾಡುವರೋ, ಅವರ ಎಲ್ಲಾ ಕಷ್ಟಗಳು ಈ ಅಧ್ಯಾಯದ ಪಾರಾಯಣದ ಕೊನೆಯಲ್ಲಿ ಪರಿಹಾರವಾಗುತ್ತವೆ".

ಓವಿ 152 - "ಯಾವುದನ್ನು ಪಡೆಯಲು ಸಾಧ್ಯವಿಲ್ಲವೋ ಅದನ್ನು ಪಡೆಯಿರಿ. ಕೊನೆಗೆ ಆಶಾರಹಿತರಾಗಿರಿ. ಅತ್ಯಂತ ಕ್ಲಿಷ್ಟಕರವಾದ ನಾಲ್ಕು ವಿಧದ ಮುಕ್ತಿಯನ್ನು ಮತ್ತು ಪರಮ ಶಾಂತಿಯನ್ನು ಪಡೆಯಿರಿ".

ಓವಿ 153 - "ಹಾಗೆಯೇ ಆಗಲಿ. ಯಾವ ಭಕ್ತರಿಗೆ ಪರಮಾರ್ಥದ ಬ್ರಹ್ಮಾನಂದವನ್ನು ಮತ್ತು ಸರಿಯಾದ ಜ್ಞಾನವನ್ನು ಹೊಂದಬೇಕೆಂದು ಆಸೆಯಿರುವುದೋ, ಅಂತಹ ಭಕ್ತರು ಈ ಅಧ್ಯಾಯವನ್ನು ಪದೇ ಪದೇ ವಿಶೇಷ ಶ್ರದ್ಧೆಯಿಂದ ಪಾರಾಯಣ ಮಾಡಬೇಕು".

ಓವಿ 154 - "ಮನಸ್ಸು ಪರಿಶುದ್ಧವಾಗುತ್ತದೆ. ಸಚ್ಚರಿತ್ರೆಯ ಪಾರಾಯಣದಿಂದ ಆಧ್ಯಾತ್ಮಿಕ ಇಚ್ಚೆ ಪ್ರಬಲವಾಗುತ್ತದೆ. ನೀವು ಇಚ್ಚಿಸಿದ್ದನ್ನು ಪಡೆಯಬಹುದು ಹಾಗೂ ಯಾವ ಇಚ್ಚೆಯು ಅಹಿತಕರವೋ, ಹಾನಿಕಾರಕವೋ ಅದು ನಾಶಗೊಳ್ಳುತ್ತದೆ. ಸ್ವಂತವಾಗಿ ನೀವೇ ಸಾಯಿಬಾಬಾರವರ ಸನಿಹತೆಯನ್ನು ಅನುಭವಿಸಬಹುದು".

    

ಶ್ರೀ ಸಾಯಿ ರುದ್ರಾಧ್ಯಾಯ ಸಂಗೀತ ಕಥೆಯ ವಿಶೇಷತೆಗಳು:

• ರಾಮಾಯಣ ಹಾಗೂ ಗುರುವಾಣಿಗಳಂತೆ ಶ್ರೀ ಸಾಯಿ ಸಚ್ಚರಿತೆಯ 11ನೇ ಅಧ್ಯಾಯವಾದ ಶ್ರೀ ಸಾಯಿ ರುದ್ರಾಧ್ಯಾಯ ಸಂಗೀತ ಕಥೆಯ ಪ್ರಪ್ರಥಮ ಪ್ರಯತ್ನ ಇದಾಗಿರುತ್ತದೆ.
• ಈ ಕಲಿಯುಗದಲ್ಲಿ ಸಾಯಿಬಾಬಾರವರ ಉಪದೇಶಗಳು ಮಾತ್ರ ಯುವ ಜನಾಂಗದ ಮನಸ್ಸಿನಲ್ಲಿ ಕ್ರಾಂತಿಯನ್ನು ಉಂಟು ಮಾಡಲು ಸಾಧ್ಯ.
• ಸಾಯಿಬಾಬಾರವರ ಉಪದೇಶಗಳು ವ್ಯಕ್ತಿಯ ವ್ಯಕ್ತಿತ್ವ ವಿಕಸನಕ್ಕೆ ಹಾಗೂ ಒತ್ತಡ ನಿರ್ವಹಣೆಗೆ ಬಹಳ ಸಹಕಾರಿಯಾಗುತ್ತದೆ.
• ಈ ಸಂಗೀತ ಕಥೆಯನ್ನು ನಡೆಸಿಕೊಡುತ್ತಿರುವವರು ಉದ್ಧಾಮ ಪಂಡಿತರಾಗಲೀ, ಜ್ಞಾನಿಯಾಗಲೀ ಅಥವಾ ಮಹಾರಾಜರಾಗಿರದೇ ಒಬ್ಬ ವಿನೀತ ಸಾಯಿ ಬಂಧುವಾಗಿರುತ್ತಾರೆ.
• ಸಾಯಿ ಪ್ರಪಂಚದಲ್ಲಿ ಡಾ.ಅಂಬೇಡ್ಕರ್ ರವರು ಕೂಡ ತಮ್ಮದೇ ಆದ ರೀತಿಯಲ್ಲಿ ಪಾತ್ರವನ್ನು ನಿರ್ವಹಿಸಿದ್ದಾರೆ. ಅದನ್ನು ಈ ಸಂಗೀತ ಕಥೆಯಲ್ಲಿ ತಿಳಿಸಲಾಗುತ್ತದೆ.
• ಇಂದಿನ ಆಧುನಿಕ ಪ್ರಪಂಚದಲ್ಲಿ ಕೆಲವು ದುಷ್ಟ ಶಕ್ತಿಗಳು ಭಕ್ತರಲ್ಲಿ ಸಾಯಿಬಾಬಾರವರ ಬಗ್ಗೆ ಇರುವ ಅಂಧ ಶ್ರದ್ಧೆಯ ಲಾಭವನ್ನು ಪಡೆಯಲು ಪ್ರಯತ್ನಿಸುತ್ತಿದ್ದಾರೆ. ಅಂತಹ ದುಷ್ಟ       ಶಕ್ತಿಗಳ ಹತ್ತಿರ ವ್ಯವಹರಿಸುವಾಗ ಸಮರ್ಥವಾಗಿ ನಿಭಾಯಿಸಲು ಇರಬೇಕಾದ ಗುಣಗಳನ್ನು ಈ ಸಂಗೀತ ಕಥೆಯ ಮುಖಾಂತರ ಭಕ್ತರಿಗೆ ತಿಳಿಸುವ ಪ್ರಾಮಾಣಿಕ ಪ್ರಯತ್ನವನ್ನು ಮಾಡಲಾಗುತ್ತಿದೆ.

ಪ್ರವಚನಕಾರರಾಗಿ, ಶ್ರೀ.ನರೇಂದ್ರ ನಾಶಿರಕರ್ ರವರು ಮಹಾರಾಷ್ಟ್ರ ರಾಜ್ಯದ ಔರಂಗಾಬಾದ್, ಅಹಮದ್ ನಗರ, ಚಂದ್ರಾಪುರ, ಬೀಡ್ ನಾಗಪುರ, ವಾರ್ದಾ, ವರೋರ, ರಾಮ್ಟೆಕ್ ಹಾಗೂ ಇನ್ನು ಹಲವಾರು ಕಡೆಗಳಲ್ಲಿ ಶ್ರೀ ಸಾಯಿ ರುದ್ರಾಧ್ಯಾಯ ಸಂಗೀತ ಕಥೆಗಳನ್ನು ನಡೆಸಿಕೊಟ್ಟಿದ್ದಾರೆ.

ಸಂಗೀತ ಸಂಯೋಜಕ ಹಾಗೂ ಗಾಯಕರಾಗಿ ಇವರು 4 ಧ್ವನಿ ಸುರಳಿಗಳನ್ನು ಹೊರತಂದಿದ್ದಾರೆ. ಅವು ಯಾವುವೆಂದರೆ: 1.ಮಾ ದೋಂಘರ್ಗಡ್ ವಾಲಿ - ಟಿ-ಸೀರೀಸ್ - ಗಾಯಕರು ಹಾಗೂ ಸಂಗೀತ ಸಂಯೋಜಕರು. 2. ಶಿವರಾಯಾಚಾ ಶೂರವೀರನೋ - ವೀನಸ್ 3. ಆಜಾ ಬಂದೇ ಧೂಪಗಾವ್, ಜಹಾ ಮಿಲೇಗೀ ಸಾಯಿಚಾವ್ (ಗಾಯಕರು: ಸುರೇಶ್ ವಾಡಕರ್, ರಾಜಾ ಹಾಸನ್, ಸಂಭಾಷಣೆ: ಸುಧೀರ್ ದಳವಿ, ಮನೋಹರ್ ಮಹಾಜನ್ ಮತ್ತು ಸ್ಮಿತಾ ಜಯಕರ್) - ಸಂಗೀತ ಸಂಯೋಜಕರು 4. ಮೇರೇ ಛೋಟೀಸೀ ಕುಟಿಯಾ ಮೇ ಸಾಯಿ ಪದಾರೋನಾ - ಸಂಗೀತ ಸಂಯೋಜಕರು. ಇವರು ಆಜಾ ಬಂದೇ ಧೂಪಗಾವ್, ಜಹಾ ಮಿಲೇಗೀ ಸಾಯಿಚಾವ್  ಮತ್ತು ಮೇರೇ ಛೋಟೀಸೀ ಕುಟಿಯಾ ಮೇ ಸಾಯಿ ಪದಾರೋನಾ ಧ್ವನಿಸುರಳಿಗಳ ಮಾರಾಟದಿಂದ ಬಂದ ಎಲ್ಲಾ ಹಣವನ್ನು ಧೂಪಗಾವ್ ನಲ್ಲಿರುವ ಸಾಯಿಧಾಮ್ ಮಂದಿರದ ಅನ್ನದಾನಕ್ಕೆ ಕಾಣಿಕೆಯಾಗಿ ನೀಡಿದ್ದಾರೆ.

ಇವರು ರಾಷ್ಟ್ರ ಪ್ರೇರಣಾ ಜ್ಯೋತಿ ಯಾತ್ರೆ ಗಾಗಿ ರಚಿಸಿ ಸಂಗೀತ ಸಂಯೋಜನೆ ಮಾಡಿದ ಶೀರ್ಷಿಕೆ ಗೀತೆಗಾಗಿ ಇವರನ್ನು ಹಿಂದಿನ ರಾಷ್ಟ್ರಪತಿಗಳಾದ ಶ್ರೀಮತಿ.ಪ್ರತಿಭಾ ಪಾಟೀಲ್ ರವರು 9ನೇ ಆಗಸ್ಟ್ 2010 ರಂದು ರಾಷ್ಟ್ರಪತಿ ಭವನದಲ್ಲಿ ನೆಡೆದ ಸಮಾರಂಭದಲ್ಲಿ ಸನ್ಮಾನ ಮಾಡಿರುತ್ತಾರೆ.  ಇವರ ಸಮಾಜ ಸೇವಾ ಕೈಂಕರ್ಯವನ್ನು ಮೆಚ್ಚಿ ಇನ್ನು ಹಲವಾರು ಸಂಘ ಸಂಸ್ಥೆಗಳು ಇವರನ್ನು ಸನ್ಮಾನಿಸಿವೆ. 

ಇವರು ಶ್ರೀಮತಿ.ಮೋನಿಕಾ ನರೇಂದ್ರ ನಾಶಿರಕರ್ ರವರನ್ನು ವಿವಾಹವಾಗಿದ್ದು ನಾಗಪುರದ ಸ್ವಗೃಹದಲ್ಲಿ ಧರ್ಮಪತ್ನಿ, ಅತ್ತೆ ಮಾವನವರೊಂದಿಗೆ ಸುಖೀ ಜೀವನವನ್ನು ನಡೆಸುತ್ತಿದ್ದಾರೆ.

ಶ್ರೀ.ನರೇಂದ್ರ ನಾಶಿರಕರ್ ರವರ ಸಂಪರ್ಕದ ವಿವರಗಳನ್ನು ಸಾಯಿಭಕ್ತರ ಅನುಕೂಲಕ್ಕಾಗಿ ಈ ಕೆಳಗೆ ನೀಡಲಾಗಿದೆ. "ಶ್ರೀ ಸಾಯಿ ರುದ್ರಾಧ್ಯಾಯ ಸಂಗೀತ ಕಥೆ" ಯನ್ನು ತಮ್ಮ ಸ್ಥಳಗಳಲ್ಲಿ ಏರ್ಪಡಿಸಲು ಇಚ್ಚಿಸುವ ಸಾಯಿ ಭಕ್ತರು ಅವರನ್ನು ನೇರವಾಗಿ ಈ ಕೆಳಗೆ ನೀಡಿರುವ ವಿಳಾಸದಲ್ಲಿ ಸಂಪರ್ಕಿಸಬಹುದಾಗಿದೆ.

ವಿಳಾಸ:

ಶ್ರೀ.ನರೇಂದ್ರ ಸುಧಾಕರ ರಾವ್ ನಾಶಿರಕರ್
ಕೇರ್ ಆಫ್. ಶ್ರೀ.ಜಿ.ಜಿ.ಪರ್ದಿ,
ಪ್ಲಾಟ್ ನಂ.48, ಪರ್ಯಾವರಣ ನಗರ,
ಸೋಮಾಲವಾಡ, ವಾರ್ದಾ ರಸ್ತೆ,
ನಾಗಪುರ-25,
ಮಹಾರಾಷ್ಟ್ರ, ಭಾರತ.

ದೂರವಾಣಿ ಸಂಖ್ಯೆಗಳು:

+91 98503 52130/+91 86005 43706

ಇ-ಮೈಲ್ ವಿಳಾಸ:

sairudra11@gmail.com


ಫೇಸ್ ಬುಕ್ ವಿಳಾಸ:

https://www.facebook.com/narendra.nashirkar.5


ಸಾಯಿಬಾಬಾ ಧ್ವನಿಸುರಳಿಗಳು:

ಆಜಾ ಬಂದೇ ಧೂಪಗಾವ್, ಜಹಾ ಮಿಲೇಗೀ ಸಾಯಿಚಾವ್  ಮತ್ತು ಮೇರೇ ಛೋಟೀಸೀ ಕುಟಿಯಾ ಮೇ ಸಾಯಿ ಪದಾರೋನಾ.

ಕನ್ನಡ ಅನುವಾದ: ಶ್ರೀಕಂಠ ಶರ್ಮ

ಸಾಯಿ ಮಹಾಭಕ್ತ - ಸ್ವಾಮಿ ಸಾಯಿ ಶರಣಾನಂದ ಆಲಿಯಾಸ್ ವಾಮನ ರಾವ್ ಪಟೇಲ್- 5ನೇ ಏಪ್ರಿಲ್ 1889 ರಿಂದ 25ನೇ ಆಗಸ್ಟ್ 1982 - ಕೃಪೆ:ಸಾಯಿಅಮೃತಧಾರಾ.ಕಾಂ

ಒಮ್ಮೆ ಶ್ರೀ.ಪ್ರಂಗೋಡ್ ಮತ್ತು ಅವರ ಧರ್ಮಪತ್ನಿ ಶ್ರೀಮತಿ.ಮಣಿ ಗೌರಿಯವರು ಶಿರಡಿಗೆ ಭೇಟಿ ನೀಡಿ ಸಾಯಿಬಾಬಾರವರನ್ನು ಭೇಟಿ ಮಾಡಿ ಅವರಿಂದ ಆಶೀರ್ವಾದವನ್ನು ಪಡೆದರು. ನಂತರ 5ನೇ ಏಪ್ರಿಲ್ 1889 ರಂದು ಶ್ರೀ.ವಾಮನರಾವ್ ಪಟೇಲ್ ರವರು ಗುಜರಾತ್ ನ ಸೂರತ್ ಜಿಲ್ಲೆಯ ಮೋಟಾ ಎಂಬ ಗ್ರಾಮದಲ್ಲಿ ಜನಿಸಿದರು. ಇವರ ಪೂರ್ವಾಶ್ರಮದ ಹೆಸರು ಶ್ರೀ.ವಾಮನರಾವ್ ಪ್ರಾಣ ಗೋವಿಂದ್ ಪಟೇಲ್. ಕಾಲಾನಂತರದಲ್ಲಿ  ಸಾಯಿಬಾಬಾರವರ ಆಶೀರ್ವಾದದಿಂದ ಶ್ರೀ.ಸ್ವಾಮಿ ಸಾಯಿ ಶರಣಾನಂದರೆಂದು ನಾಮಾಂಕಿತರಾದರು.

ಇವರು ಕೇವಲ 3 ವರ್ಷದ ಮಗುವಾಗಿದ್ದಾಗ ತೀರ್ವವಾದ ಖಾಯಿಲೆಯಿಂದ ಬಳಲುತ್ತಿದ್ದರು. ಇವರ ತಂದೆ ತಾಯಿಗಳಿಗೆ ಸಾಯಿಬಾಬಾರವರಲ್ಲಿ ಸಂಪೂರ್ಣ ವಿಶ್ವಾಸವಿತ್ತು. ಅದರಂತೆ ಸಾಯಿಬಾಬಾರವರು ಒಬ್ಬ ಫಕೀರನ ರೂಪದಲ್ಲಿ ಇವರ ಮನೆಗೆ ಬಂದು ನೀರಿನಲ್ಲಿ ಉಧಿಯನ್ನು ಬೆರೆಸಿ ಮಗುವಿಗೆ ನೀಡುವಂತೆ ಹೇಳಿದರು ಮತ್ತು ಆ ಮಗುವನ್ನು ನೋಡಿ "ಇವನ ಹಿಂಭಾಗದ ಬಲಭಾಗದಲ್ಲಿ ಒಂದು ಮಚ್ಚೆಯಿದ್ದು ಮುಂದೆ ಈ ಹುಡುಗ ಒಬ್ಬ "ಸತ್ಪುರುಷ" ನಾಗುತ್ತಾನೆ" ಎಂದು ಭವಿಷ್ಯ ನುಡಿದಿದ್ದರು. ಬಾಬಾರವರು ಹೇಳಿದಂತೆ ಹುಡುಗನಿಗೆ ಉಧಿಯನ್ನು ನೀರಿನಲ್ಲಿ ಬೆರೆಸಿ ನೀಡಲಾಯಿತು. ಹುಡುಗನು ಆಶ್ಚರ್ಯಕರ ರೀತಿಯಲ್ಲಿ ಬಾಬಾರವರ ಆಶೀರ್ವಾದದಿಂದ ಗುಣಹೊಂದಿದನು.

ಇವರ ಪ್ರೈಮರಿ ಶಾಲೆಯ ವ್ಯಾಸಂಗವು ಸೂರತ್ ಮತ್ತು ಅಹಮದಾಬಾದ್ ನಲ್ಲಿ ನಡೆದವು. ಇವರು ಕೇವಲ 13 ವರ್ಷದವರಾಗಿದ್ದಾಗ, ಸಾಯಿಬಾಬಾರವರು ಇವರಿಗೆ ಸೋಮನಾಧ ಮಂದಿರದಲ್ಲಿ ಒಬ್ಬ ಫಕೀರನ ರೂಪದಲ್ಲಿ ಬಂದು ದರ್ಶನ ನೀಡಿದ್ದರು. ನಂತರ 1910ನೇ ಇಸವಿಯಲ್ಲಿ ಮುಂಬೈನಲ್ಲಿ ಬಿ.ಎ.ಪದವಿಯನ್ನು ಪೂರ್ಣಗೊಳಿಸಿ ನಂತರ 1912ನೇ ಇಸವಿಯಲ್ಲಿ ಎಲ್.ಎಲ್.ಬಿ ಯನ್ನು ಕೂಡ ಪೂರ್ಣಗೊಳಿಸಿದರು. ಇವರು ಕಾಲೇಜಿನಲ್ಲಿ ವ್ಯಾಸಂಗ ಮಾಡುತ್ತಿದ್ದಾಗ ದೇವರ ಅಸ್ತಿತ್ವವು ಒಂದು ಅದ್ಭುತ ಚಮತ್ಕಾರವೋ ಅಥವಾ ನಿಜವೋ ಎಂದು ಹಲವಾರು ಬಾರಿ ಪ್ರಧ್ಯಾಪಕರನ್ನು ವಿಚಾರಿಸಿದ್ದರು. ಆದರೆ, ಆ ವಿಚಿತ್ರ ಪ್ರಶ್ನೆಗೆ ಪ್ರಾಧ್ಯಾಪಕರ ಬಳಿ ಉತ್ತರ ಇರುತ್ತಿರಲಿಲ್ಲ.

ಒಮ್ಮೆ ಇವರು ತಮ್ಮ ತಂದೆಯವರ ಜೊತೆಯಲ್ಲಿ ಅಕ್ಕಲಕೋಟೆ ಮಹಾರಾಜರ ಶಿಷ್ಯರಾದ ಶ್ರೀ ಬಾಲಕೃಷ್ಣ ಮಹಾರಾಜರ ದರ್ಶನಕ್ಕೆಂದು ಮುಂಬೈಗೆ ಹೋಗಿದ್ದರು. ಅಲ್ಲಿ ಇವರು ಮಹಾರಾಜರಿಗೆ ಅದೇ ಪ್ರಶ್ನೆಯನ್ನು ಕೇಳಿದರು. ಈ ಘಟನೆ ನಡೆದಿದ್ದು 1904ನೇ ಇಸವಿಯಲ್ಲಿ. ಆಗ ವಾಮನ ರಾವ್ ರವರಿಗೆ ಕೇವಲ 15 ವರ್ಷ. ಈ ವಿಚಿತ್ರ ಪ್ರಶ್ನೆಯನ್ನು ಮಾಡುತ್ತಿರುವ ವಾಮನ ರಾವ್ ರವರನ್ನು ನೋಡಿ ಮಹಾರಾಜರು ಮೊದಲು ಕೋಪಗೊಂಡರು. ಆದರೆ ಸ್ವಲ್ಪ ಸಮಯದ ನಂತರ ಇವರಿಗೆ ಅಕ್ಕಲಕೋಟೆ ಮಹಾರಾಜರ ಜೀವನ ಚರಿತ್ರೆ ಹಾಗೂ ಮರಾಠಿ ಏಕನಾಥ ಭಾಗವತ ಗ್ರಂಥಗಳನ್ನು ನೀಡಿ ಅವುಗಳನ್ನು ಪಾರಾಯಣ ಮಾಡುವಂತೆ ಸೂಚನೆ ನೀಡಿದರು. ವಾಮನ ರಾವ್ ರವರು "ಯಾವ ಸಂತರು ನನಗೆ ದೇವರ ದರ್ಶನವನ್ನು ಮಾಡಿಸುತ್ತಾರೋ ಅಂತಹ ಸಂತರನ್ನು ನಾನು ನನ್ನ ಗುರುವೆಂದು ಸ್ವೀಕರಿಸುವೆ" ಎಂದು ಮಹಾರಾಜರಿಗೆ ಉತ್ತರಿಸಿದರು. ಅಕ್ಕಲಕೋಟೆ ಮಹಾರಾಜರ ಜೀವನ ಚರಿತ್ರೆಯನ್ನು ಪಾರಾಯಣ ಮಾಡಿದ ಬಳಿಕ ಇವರಿಗೆ ದೇವರ ದರ್ಶನವನ್ನು ಮಾಡಿಸಲು ಶಕ್ಯರಿರುವ ಸಂತರು ಇನ್ನೂ ಈ ಭೂಮಿಯ ಮೇಲೆ ಇದ್ದಾರೆ ಎಂಬ ನಂಬಿಕೆ ಹುಟ್ಟಿತು. ಅಕ್ಕಲಕೋಟೆ ಮಹಾರಾಜರನ್ನು ದತ್ತಾತ್ರೇಯರ ನಾಲ್ಕನೇ ಅವತಾರವೆಂದು ಪರಿಗಣಿಸಲಾಗಿದ್ದು ಇವರು 1878ರಲ್ಲಿ ಸಮಾಧಿ ಹೊಂದಿರುತ್ತಾರೆ. ನಂತರ ಇವರ ಸ್ಥಾನಕ್ಕೆ ಬಾಲಕೃಷ್ಣ ಮಹಾರಾಜರು ಬಂದರು ಮತ್ತು ಅವರ ದರ್ಶನಕ್ಕೆ ವಾಮನ ರಾವ್ ರವರ ತಂದೆಯವರು ಆಗಾಗ್ಗೆ ಹೋಗುತ್ತಿದ್ದರು.

ಈ ಮಧ್ಯೆ ವಾಮನ ರಾವ್ ರವರ ತಂದೆಯ ಬಂಧುಗಳಾದ ಸಾಕಾರ್ ಲಾಲ್ ಕೇಶವ ಲಾಲ್ ಭಟ್ ಎಂಬುವರು ಅಪಘಾತಕ್ಕೆ ಈಡಾದರು. ಅಪಘಾತದಲ್ಲಿ ಅವರ ಕಾಲುಗಳಿಗೆ ತುಂಬ ಪೆಟ್ಟು ಬಿದ್ದು ಎಡಗಾಲಿನ ಮೊಣಕಾಲಿನ ನರಗಳು ಬಹಳವಾಗಿ ಘಾಸಿಗೊಂಡಿದ್ದವು. ಅವರು ಎಲ್ಲಾ ರೀತಿಯ ವೈದ್ಯೋಪಚಾರಗಳನ್ನು ಮಾಡಿದ್ದರೂ ಸಹ ಸ್ವಲ್ಪವೂ ಗುಣವಾಗಿರಲಿಲ್ಲ. ಕಾಲಿಗೆ ತೀವ್ರ ಪಟ್ಟಾದದ್ದರಿಂದ ಸರಿಯಾಗಿ ನಡೆಯಲು ಆಗುತ್ತಿರಲಿಲ್ಲ. ಆಗ ವಾಮನ್ ರಾವ್ ರವರು ಸಾಕಾರ್ ಲಾಲ್ ರವರ ಕಾಲಿನ ತೊಂದರೆ ಒಬ್ಬ ನಿಜವಾದ ಸಂತರ ಮೊರೆ ಹೋದರೆ ಪರಿಹಾರವಾಗುತ್ತದೆ ಎಂದು ಯೋಚಿಸಿದರು. ಆದ ಕಾರಣ, ಅವರು ಒಬ್ಬ ನಿಜವಾದ ಸಂತರನ್ನು ಹುಡುಕಲು ಪ್ರಾರಂಭಿಸಿದರು.

ಒಮ್ಮೆ ಖೇಡಾ ಜಿಲ್ಲೆಯ ಉಪ ಕಲೆಕ್ಟರ್ ಹಾಗೂ ಅನನ್ಯ ಸಾಯಿ ಭಕ್ತರಾದ ಶ್ರೀ.ಹರಿ ವಿನಾಯಕ ಸಾಥೆಯವರನ್ನು ಪ್ರಾಣ ಗೋವಿಂದ ದಾಸ್ ರವರು ಭೇಟಿ ಮಾಡಿದರು. ಸಾಥೆಯವರು ಸಾಯಿಬಾಬಾರವರ ಬಗ್ಗೆ ಅನೇಕ ಕಥೆಗಳನ್ನು ಹಾಗೂ ಅವರು ಮಾಡುತ್ತಿರುವ ಅನೇಕ ಲೀಲೆಗಳನ್ನು ಇವರಿಗೆ ವಿವರಿಸಿದರು. ಇದರಿಂದ ಪ್ರಭಾವಿತರಾದ ಪ್ರಾಣ ಗೋವಿಂದ ದಾಸ್ ಹಾಗೂ ಸಾಕಾರ್ ಲಾಲ್ ರವರು ಸಾಥೆಯವರಿಂದ ಪರಿಚಯ ಪತ್ರವನ್ನು ಪಡೆದು ಕೂಡಲೇ ಶಿರಡಿಗೆ ಪ್ರಯಾಣ ಬೆಳೆಸಿದರು. 1911ನೇ ಇಸವಿಯ ಮೇ ತಿಂಗಳಿನಲ್ಲಿ ಸಾಥೆಯವರು ಶಿರಡಿಯಲ್ಲಿ ಹೋಟೆಲ್ ನಡೆಸುತ್ತಿದ್ದ ನಾನಾ ಸಾಹೇಬ್ ಚಂದೋರ್ಕರ್ ರವರ ಬಂಧುಗಳಾದ ಬಾಳಾಭಾವು ಚಂದೋರ್ಕರ್ ರವರಿಗೆ ಪರಿಚಯ ಪತ್ರವನ್ನು ಕೊಟ್ಟು ಇವರನ್ನು ಶಿರಡಿಗೆ ಕಳುಹಿಸಿದ್ದರು. ಆಗ ವಾಮನ ರಾವ್ ರವರ ತಂದೆಯವರ ಹಲ್ಲುಗಳನ್ನು ಕೀಳಲಾಗಿದ್ದ ಕಾರಣ ಅವರ ಹಲ್ಲಿನ ಒಸಡುಗಳು ದುರ್ಬಲವಾಗಿದ್ದವು. ಆದ ಕಾರಣ, ಅವರಿಗೆ ಚಪಾತಿ ಅಥವ ಮತ್ತಿತರ ಯಾವುದೇ ರೀತಿಯ ಗಟ್ಟಿ ಪದಾರ್ಥಗಳನ್ನು ತಿನ್ನಲು ಆಗುತ್ತಿರಲಿಲ್ಲ. ಅವರು ತಮ್ಮ ಮನೆಯಲ್ಲಿ ಕೇವಲ ಉಪ್ಪಿಟ್ಟನ್ನು ತಿನ್ನುತ್ತಿದ್ದರು. ಆದರೆ, ಶಿರಡಿಯಲ್ಲಿ ತಮಗೆ ಯಾರು ಸಹಾಯ ಮಾಡುತ್ತಾರೆ ಎಂದು ಇವರು ಯೋಚನಾಮಗ್ನರಾಗಿದ್ದರು. ಆದರೂ ಧೈರ್ಯ ಮಾಡಿ ವಾಮನರಾವ್ ಪಟೇಲ್ ರವರ ತಂದೆ ಹಾಗೂ ಸಾಕಾರ್ ಲಾಲ್ ರವರು ಸಾಯಿಬಾಬಾರವರ ಆಶೀರ್ವಾದವನ್ನು ಪಡೆಯಲು ಮತ್ತು ಸಾಕಾರ್ ಲಾಲ್ ರವರ ತೊಂದರೆಯನ್ನು  ಹೋಗಲಾಡಿಸಿಕೊಳ್ಳುವ ಸಲುವಾಗಿ ಶಿರಡಿಗೆ ಹೋದರು. ಶಿರಡಿಯಲ್ಲಿ ಭೋಜನ ಮಾಡುವಾಗ ಇವರಿಗೆ ಗಟ್ಟಿಯಾದ ಚಪಾತಿಯನ್ನು ಬಡಿಸಲಾಯಿತು. ಆ ಗಟ್ಟಿ ಚಪಾತಿಯನ್ನು ಹೇಗೆ ತಿನ್ನುವುದು ಎಂಬ ಗೊಂದಲದಲ್ಲಿ ಪ್ರಾಣ ಗೋವಿಂದ ದಾಸ್ ರವರು ಬಿದ್ದರು. ಇವರು ಹೀಗೆ ಯೋಚಿಸುತ್ತಿರುವಾಗ, ದ್ವಾರಕಾಮಾಯಿಯ ಕಡೆಯಿಂದ ಓಡಿಬಂದ ವ್ಯಕ್ತಿಯೊಬ್ಬ "ಬಾಬಾರವರು ಒಂದು ಪಾತ್ರೆಯ ತುಂಬಾ ಶಿರಾ ತರಲು ಹೇಳಿದ್ದಾರೆ. ಇಲ್ಲಿ ಊಟಕ್ಕೆ ಕುಳಿತಿರುವ ಯಾರೂ ಊಟವನ್ನು ಪ್ರಾರಂಭಿಸಬೇಡಿ ಮತ್ತು ಶಿರಾವನ್ನು ತಿನ್ನದೇ ಹೋಗಬೇಡಿ. ದಯಮಾಡಿ ಶಿರಾ ಬರುವವರೆಗೂ ಕಾಯ್ದು ಕುಳಿತಿರಿ" ಎಂದು ವಿನಂತಿ ಮಾಡಿಕೊಂಡನು. ಈ ಮಾತನ್ನು ಕೇಳಿ ಪ್ರಾಣ ಗೋವಿಂದ ದಾಸ್ ರವರಿಗೆ ಅಚ್ಚರಿಯಾಯಿತು. ಆಗ ಅವರಿಗೆ ಶಿರಡಿಯ ಸಾಯಿಬಾಬಾರವರು ಅನನ್ಯ ಸಂತರು ಹಾಗೂ ತಮಗಿದ್ದ ತೊಂದರೆಯನ್ನು ನಿವಾರಿಸುವ ಸಲುವಾಗಿ ಸಾಯಿಬಾಬಾರವರು ಶಿರಾವನ್ನು ಕಳುಹಿಸಿದ್ದಾರೆ ಎಂದು ಮನದಟ್ಟಾಯಿತು. ಆದರೆ ಅವರು ಶಿರಡಿಗೆ ಬಂದ ಮುಖ್ಯ ಕಾರಣ ಸಾಕಾರ್ ಲಾಲ್ ರವರ ಕಾಲಿನ ಕುಂಟುತನದ ನಿವಾರಣೆ ಆಗಿತ್ತು.ಹೀಗೆಯೇ ಎರಡು ದಿನಗಳನ್ನು ಶಿರಡಿಯಲ್ಲಿ ಕಳೆದರು. ನಂತರ ಊರಿಗೆ ಹಿಂತಿರುಗುವ ಸಲುವಾಗಿ ಬಾಬಾರವರ ಅಪ್ಪಣೆಯನ್ನು ಪಡೆಯಲು ಅವರ ಬಳಿ ಬಂದರು. ಕೋಪರಗಾವ್ ಗೆ ತೆರಳಲು ಕುದುರೆಯ ಗಾಡಿಯನ್ನು ಹತ್ತುವ ಸಲುವಾಗಿ ಬಾಳಾಭಾವುವಿನ ಅಂಗಡಿಯ ಹತ್ತಿರ ಬಂದರು. ಇನ್ನೇನು ಕುದುರೆಯ ಗಾಡಿಯನ್ನು ಹತ್ತಬೇಕೆಂದುಕೊಂಡು ಸಾಕಾರ್ ಲಾಲ್ ಗಾಡಿಯನ್ನು ಹತ್ತುತ್ತಿರುವಾಗ ಅವರ ಕಾಲು ನೋವು ತೀವ್ರವಾಯಿತು. ಅವರು ತಮ್ಮ ಕಾಲುಗಳು ಇನ್ನು ಉಪಯೋಗಕ್ಕೆ ಬರುವುದಿಲ್ಲ ಎಂದು ಮನದಲ್ಲಿ ಅಂದುಕೊಂಡರು. ಆದರೂ ಕೂಡ ಪ್ರಯತ್ನಪೂರ್ವಕವಾಗಿ ತಮ್ಮ ಕಾಲುಗಳನ್ನು ಹಿಂದೆ ಮುಂದೆ ಆಡಿಸಿದರು. ಅಚ್ಚರಿಯ ಸಂಗತಿ ಏನೆಂದರೆ, ಆ ಕ್ಷಣದಲ್ಲಿ ಅವರ ಕಾಲು ನೋವು ಸಂಪೂರ್ಣ ಗುಣವಾಗಿ ಅವರು ಮೊದಲಿನಂತೆ ನಡೆದಾಡಲು ಪ್ರಾರಂಭಿಸಿದರು. ಹೀಗೆ ಸಾಯಿಬಾಬಾರವರ ಆಶೀರ್ವಾದದಿಂದ ಅವರ ಕಾಲು ನೋವು ಸಂಪೂರ್ಣ ಗುಣವಾಯಿತು. ಮುಂಬೈಗೆ ಬಂದಿಳಿದ ಕೂಡಲೇ ಪ್ರಾಣ ಗೋವಿಂದ ದಾಸ್ ಹಾಗೂ ಸಾಕಾರ್ ಲಾಲ್ ರವರು ಶಿರಡಿಯಲ್ಲಿ ತಮಗಾದ ದಿವ್ಯ ಅನುಭವಗಳನ್ನು ಕುರಿತು ವಾಮನ ರಾವ್ ರ ಬಳಿ ಹೇಳಿಕೊಂಡರು. ಅಲ್ಲದೇ, ಸಾಯಿಬಾಬಾರವರು ಒಬ್ಬ ನಿಜವಾದ ಸಂತರೆಂದು ಹಾಗೂ ಒಮ್ಮೆ ಶಿರಡಿಗೆ ಭೇಟಿ ಕೊಟ್ಟರೆ ಇವರಿಗಿದ್ದ ಎಲ್ಲಾ ಅನುಮಾನಗಳು ಪರಿಹಾರವಾಗುವುದೆಂದು ಅವರುಗಳು ತಿಳಿಸಿದರು.

ನಾನಾ ಸಾಹೇಬ್ ಚಂದೋರ್ಕರ್ ರವರು ಆ ಸಮಯದಲ್ಲಿ ಮುಂಬೈನಲ್ಲಿದ್ದರು. ಅವರು ತಮ್ಮ ಬಂಧುಗಳಾದ ಬಾಳಾಭಾವು ಚಂದೋರ್ಕರ್ ರವರಿಗೆ ಪರಿಚಯ ಪತ್ರವನ್ನು ಕೊಟ್ಟು ಇವರನ್ನು ಶಿರಡಿಗೆ ಕಳುಹಿಸಿದರು. ತಮ್ಮ ಮಗ ಕಾನೂನು ವ್ಯಾಸಂಗ ಮಾಡಿದ್ದ ಕಾರಣ ವಿಚಾರಣೆ ಮಾಡದೇ ಹಾಗೂ ತಾವೇ ಪ್ರತ್ಯಕ್ಷ  ನೋಡದೇ ಏನನ್ನೂ ನಂಬುವುದಿಲ್ಲ ಎಂದು ಪ್ರಾಣ ಗೋವಿಂದ ದಾಸ್ ರವರಿಗೆ ಚೆನ್ನಾಗಿ ತಿಳಿದಿತ್ತು. ಅಲ್ಲದೇ, ವಾಮನ ರಾವ್ ರವರು ಯಾವಾಗಲೂ "ನನಗೆ ನೇರವಾಗಿ ದೇವರ ದರ್ಶನವಾಗುವ ತನಕ ನಾನು ದೇವರ ಅಸ್ತಿತ್ವವನ್ನು ನಂಬುವುದಿಲ್ಲ"  ಎಂದು ನುಡಿಯುತ್ತಿದ್ದರು. ಪ್ರಾಣ ಗೋವಿಂದ ದಾಸ್ ರವರು ವಾಮನ ರಾವ್ ರವರಿಗೆ "ಮಗನೇ, ಆಕಾಶದಲ್ಲಿರುವ ನಕ್ಷತ್ರ, ಸೂರ್ಯ ಹಾಗೂ ಚಂದ್ರರನ್ನು ನೋಡು. ಅವುಗಳು ಕಾಲಕ್ಕೆ ಸರಿಯಾಗಿ ಉದಯಿಸುತ್ತವೆ ಹಾಗೂ ಅಸ್ತಮಿಸುತ್ತವೆ. ನಮಗೆ ಜೀವನಾಧಾರವಾದ ಬೆಳಕನ್ನು ನೀಡುತ್ತವೆ.  ಇದಕ್ಕೆಲ್ಲಾ ಆ ಪರಮಾತ್ಮನೊಬ್ಬನೇ ಕಾರಣ. ನಾವುಗಳು ಅಂದುಕೊಂಡಂತೆ ಏನೂ ನಡೆಯುವುದಿಲ್ಲ" ಎಂದು ಉಪದೇಶ ಮಾಡಿದರು. ಆದರೆ ಇದರಿಂದ ವಾಮನ ರಾವ್ ರವರಿಗೆ ಸಮಾಧಾನ ವಾಗುತ್ತಿರಲಿಲ್ಲ. ಬದಲಿಗೆ, ಅವರು "ಈ ಕಾರ್ಯಗಳೆಲ್ಲ ತಂತಾನೇ ಸಮಯಕ್ಕೆ ಸರಿಯಾಗಿ ನಡೆಯುತ್ತವೆ. ಈ ಕ್ರಿಯೆಗಳಲ್ಲಿ ದೇವರು ಎಲ್ಲಿದ್ದಾನೆ" ಎಂದು ಪ್ರಶ್ನೆ ಮಾಡುತ್ತಿದ್ದರು. ಆದುದರಿಂದ ಇವರು ಶಿರಡಿಗೆ ಹೋಗುವ ಮೊದಲೇ ಪ್ರಾಣ ಗೋವಿಂದ ದಾಸ್ ರವರು ಸಾಯಿಬಾಬಾರವರ ಬಗ್ಗೆ ಹಾಗೂ ಅವರು ಯಾವ ರೀತಿಯಲ್ಲಿ ತಮ್ಮ ಭಕ್ತರನ್ನು ಆಶೀರ್ವದಿಸುತ್ತಾರೆ ಎಂಬ ವಿಷಯಗಳ ಬಗ್ಗೆ ಸಂಪೂರ್ಣ ಮಾಹಿತಿಯನ್ನು ಇವರಿಗೆ ನೀಡುತ್ತಾ "ನೋಡು ವಾಮನ, ಸಾಯಿಬಾಬಾರವರು ಒಬ್ಬ ವಿಲಕ್ಷಣ ವ್ಯಕ್ತಿ. ಅವರಿಗೆ ಎದುರುತ್ತರ ನೀಡಬೇಡ. ಬದಲಿಗೆ ಅವರ ಮಾತುಗಳಲ್ಲಿರುವ ಗೂಡಾರ್ಥವನ್ನು ಕುರಿತು ಯೋಚಿಸು. ಸಾಯಿಬಾಬಾರವರು ನೀಡುವುದು ಒಳ್ಳೆಯದೇ ಆಗಿರಲಿ, ಕೆಟ್ಟದ್ದೇ ಆಗಿರಲಿ, ಪ್ರೀತಿಯಿಂದ ನೀಡಲಿ ಅಥವಾ ಕೋಪದಿಂದ ನೀಡಲಿ, ಅದನ್ನು ಕೃತಜ್ಞತೆಯಿಂದ ಸ್ವೀಕರಿಸು. ಸಂತರೂ ಏನೇ ನೀಡಲಿ ಅದು ನಮ್ಮ ಒಳಿತಿಗಾಗಿ ಎಂದು ತಿಳಿ". ತಂದೆಯವರು ಹೇಳಿದನ್ನು ಶ್ರದ್ಧೆಯಿಂದ ಕೇಳಿದ ವಾಮನ ರಾವ್ ರವರು ನಾನಾರವರು ಬಾಳಾಭಾವುರವರಿಗೆ ನೀಡಿದ ಪರಿಚಯ ಪತ್ರವನ್ನು ಹಿಡಿದುಕೊಂಡು 10ನೇ ಡಿಸೆಂಬರ್ 1911 ರಂದು ಮೊದಲ ಬಾರಿಗೆ ಶಿರಡಿಗೆ ತೆರಳಿದರು. ಅವರು ಶಿರಡಿಯನ್ನು ತಲುಪಿದಾಗ "ಸಾಯಿಬಾಬಾರವರಿಗೆ ಜಯವಾಗಲಿ" ಎಂದು ಜಯಘೋಷ ಮಾಡುತ್ತಿರುವ ಸಣ್ಣ ಗುಂಪೊಂದನ್ನು ಕಂಡರು. ಮಾರವಾಡಿ ಕುದುರೆಗಾಡಿ ಮಾಲೀಕನು ಗಾಡಿಯನ್ನು ನಿಲ್ಲಿಸಿ "ಜನಗಳ ಮಧ್ಯದಲ್ಲಿ ಹೋಗುತ್ತಿರುವವರೆ ಸಾಯಿಬಾಬಾ. ಅವರು ಲೇಂಡಿ ಉದ್ಯಾನವನಕ್ಕೆ ವಿಹಾರಕ್ಕಾಗಿ ತೆರಳುತ್ತಿದ್ದಾರೆ". ಹೀಗೆ ನುಡಿಯುತ್ತಾ ಆ ಕುದುರೆಗಾಡಿ ಮಾಲೀಕನು ಗಾಡಿಯಿಂದ ಕೆಳಗೆ ಇಳಿದು ಸಾಯಿಬಾಬಾರವರಿಗೆ ನಮಸ್ಕರಿಸಿದನು. ವಾಮನ ರಾವ್ ರವರೂ ಕೂಡ ನಂತೆ ತಾವೂ ಬಾಬಾರವರಿಗೆ ನಮಸ್ಕಾರ ಮಾಡಿದರು. ವಾಮನ ರಾವ್ ರವರನ್ನು ನೋಡಿ ಸಾಯಿಬಾಬಾರವರು " ಕೇವಲ ಹುಲು ಮಾನವನಾಗಿರುವ ನೀನು ದೇವರ ಅಸ್ತಿತ್ವವನ್ನೇ ಪ್ರಶ್ನಿಸುತ್ತೀಯಾ? ಇಲ್ಲಿಂದ ಹೊರಟುಹೋಗು. ಆ ಕ್ಷಣದಲ್ಲಿ ವಾಮನ ರಾವ್ ರವರಿಗೆ "ಇವರೇ ತಾವು ಹುಡುಕುತ್ತಿರುವ ದೇವರು" ಎಂದು ಮನದಟ್ಟಾಯಿತು. ಇವರಿಗೆ ತಂದೆಯವರು ಹೇಳಿದ ಅವರ ಅನುಭವಗಳೆಲ್ಲಾ ನೆನಪಾದವು. ನಾನಾ ಸಾಹೇಬರು ಪರಿಚಯ ಪತ್ರವನ್ನು ನೀಡಿದ್ದರಿಂದ ಬಾಳಾಭಾವು ಇವರಿಗೆ ದೀಕ್ಷಿತವಾಡಾದಲ್ಲಿ ಉಳಿದುಕೊಳ್ಳಲು ಸ್ಥಳವನ್ನು ಏರ್ಪಾಡು ಮಾಡಿ ಸಾಯಿಬಾಬಾರವರ ದರ್ಶನಕ್ಕೆ ಕರೆದುಕೊಂಡು ಹೋದರು.ಒಂದು ದರ್ಶನದಿಂದ ತೃಪ್ತಿಯಾಗದೇ, ವಾಮನ ರಾವ್ ಮತ್ತೊಮ್ಮೆ ಒಬ್ಬ ಮಾರವಾಡಿ ಭಕ್ತರೊಡನೆ ಸಾಯಿಬಾಬಾರವರ ದರ್ಶನಕ್ಕೆಂದು ದ್ವಾರಕಾಮಾಯಿಗೆ ತೆರಳಿದರು. ಆದರೆ ಬಾಬಾರವರು ಇವರ ಮೇಲೆ ಕೋಪ ಮಾಡಿಕೊಂಡಂತೆ ನಟಿಸುತ್ತಾ ಇವರಿಗೆ ದ್ವಾರಕಾಮಾಯಿಯ ಒಳಗಡೆ ಬರಲು ಅನುಮತಿ ನೀಡಲಿಲ್ಲ. ಸಾಯಿಬಾಬಾರವರ ವರ್ತನೆಯಿಂದ ಹೆದರಿ ಈ ಇಬ್ಬರೂ ಭಕ್ತರೂ ಮಧ್ಯಾನ್ಹದ ಆರತಿಗೆ ಹೋಗಲೇ ಇಲ್ಲ. ಬದಲಿಗೆ ರಾಧಾಕೃಷ್ಣ ಮಾಯಿಯ ಕುಟೀರದೊಳಗೆ ಕುಳಿತುಕೊಂಡು ಅಲ್ಲಿಂದಲೇ ಮಧ್ಯಾನ್ಹ ಆರತಿಯನ್ನು ವೀಕ್ಷಿಸಿದರು. ಮಧ್ಯಾನ್ಹ ಊಟದ ನಂತರ ವಾಮನ ರಾವ್ ರವರು ಉಚ್ಚ ನ್ಯಾಯಾಲಯದ ನ್ಯಾಯಾಧೀಶರಾದ ಶ್ರೀ.ಶಿಂಗಣೆಯವರೊಂದಿಗೆ ದ್ವಾರಕಾಮಾಯಿಗೆ ಬಾಬಾರವರ ದರ್ಶನಕ್ಕೆಂದು ತೆರಳಿದರು. ಆಗ ಬಾಬಾರವರು ಇವರಿಗೆ ರಾಧಾಕೃಷ್ಣಮಾಯಿ ಕಳುಹಿಸಿದ್ದ ದ್ರಾಕ್ಷಿಯನ್ನು ಪ್ರಸಾದವಾಗಿ ನೀಡಿದರು. ಬಾಬಾರವರು ತಮ್ಮ ಆಸನದಲ್ಲಿ ಕುಳಿತು ತಮ್ಮ ಬಲಗೈಯನ್ನು ದಿಂಬಿನ ಮೇಲಿರಿಸಿಕೊಂಡು ಕುಳಿತಿದ್ದರು. ವಾಮನ ರಾವ್ ರವರು ದಿಂಬಿನ ಪಕ್ಕದಲ್ಲಿದ್ದ ಕಲ್ಲಿನ ಮೇಲೆ ಕುಳಿತುಕೊಂಡರು. ಸ್ವಲ್ಪವೇ ಹೊತ್ತಿನಲ್ಲಿ ದ್ವಾರಕಾಮಾಯಿಗೆ ಭಕ್ತರು ಬಂದು ಸೇರಲು ಪ್ರಾರಂಭಿಸಿದರು. ಬಂದ ಭಕ್ತರೆಲ್ಲರೂ ಶಿರಡಿಗೆ ಬಂದಿರುವ ಪ್ಲೇಗ್ ಮಹಾಮಾರಿಯಿಂದ ತಮ್ಮನ್ನು ರಕ್ಷಿಸುವಂತೆ ಪ್ರಾರ್ಥನೆ ಮಾಡಿಕೊಂಡರು.

ವಾಮನ ರಾವ್ ರವರು 1913ನೇ ಇಸವಿಯಲ್ಲಿ ಒಂದು ಪ್ರತಿಷ್ಟಿತ ವಕೀಲಿ ಸಂಸ್ಥೆಯಲ್ಲಿ ಕೆಲಸಕ್ಕೆ ಸೇರಿಕೊಂಡರು. ಮೇ ತಿಂಗಳಿನಲ್ಲಿ ನ್ಯಾಯಾಲಯದ ರಜೆ ಇದ್ದ ಕಾರಣ ಶಿರಡಿಗೆ ಸಾಯಿಬಾಬಾರವರ ದರ್ಶನ ಮಾಡಲು ಬಂದರು. ನ್ಯಾಯಾಲಯದ ರಜೆ ಮುಗಿದಿದ್ದರಿಂದ ವಾಮನ ರಾವ್ ಮುಂಬೈಗೆ ತೆರಳಲು ಸಾಯಿಬಾಬಾರವರ ಅಪ್ಪಣೆ ಪಡೆಯಲು ಅವರ ಬಳಿಗೆ ಬಂದರು. ಆದರೆ ಸಾಯಿಬಾಬಾರವರು ಇವರಿಗೆ ಅಪ್ಪಣೆ ನೀಡಲಿಲ್ಲ. ಬದಲಿಗೆ ಮಾರ್ಚ್ 1914 ರವರೆಗೆ ಸುಮಾರು ಹನ್ನೊಂದು ತಿಂಗಳ ಕಾಲ ಯಾವುದಾದರೂ ಒಂದು ಕಾರಣ ನೀಡಿ ಇವರನ್ನು ಶಿರಡಿಯಲ್ಲೇ ಉಳಿಸಿಕೊಂಡರು. ಇವರು ಮುಂಬೈಗೆ ವಾಪಸಾಗದಿದ್ದರಿಂದ ಚಿಂತಾಕ್ರಾಂತರಾದ ಇವರ ಮನೆಯವರು ಇವರ ಬಗ್ಗೆ ಜ್ಯೋತಿಷಿಗಳನ್ನು ವಿಚಾರಿಸಲು, ಅವರುಗಳು ಇವರು ಒಂದು ಪುಣ್ಯಕ್ಷೇತ್ರದಲ್ಲಿ ಸುಖವಾಗಿರುವರೆಂದು ಮತ್ತು ಇವರ ಬಗ್ಗೆ ಯಾವುದೇ ಚಿಂತೆ ಮಾಡುವ ಅವಶ್ಯಕತೆಯಿಲ್ಲವೆಂದು ಭವಿಷ್ಯ ನುಡಿದರು. ನಂತರ ಬಾಬಾರವರು ಇವರಿಗೆ ಮನೆಗೆ ಹೋಗಲು ಅನುಮತಿ ನೀಡಿದರು.

ಮತ್ತೊಮ್ಮೆ ಅಕಸ್ಮಾತ್ತಾಗಿ 1916ನೇ ಇಸವಿಯಲ್ಲಿ ಶಿರಡಿಗೆ ತೆರಳುತ್ತಿದ್ದ ತಮ್ಮ ಸ್ನೇಹಿತರನ್ನು ಕಳುಹಿಸಿಕೊಡಲು ನಿಲ್ದಾಣಕ್ಕೆ ಬಂದವರು ಇದ್ದಕಿದ್ದಂತೆ ತಾವೂ ಶಿರಡಿಗೆ ಹೊರಟುಬಿಟ್ಟರು. ಇವರ ಬರುವಿಕೆಯನ್ನೇ ಎದುರುನೋಡುತ್ತಿದ್ದುದಾಗಿ ಹೇಳಿದ ಸಾಯಿಬಾಬಾರವರು ಇಪ್ಪತ್ತೊಂದು ದಿನಗಳ ಕಾಲ ಇವರನ್ನು ಶಿರಡಿಯಲ್ಲಿ ಇರಿಸಿಕೊಂಡು ನಂತರ ಮುಂಬೈಗೆ ತೆರಳಲು ಅನುಮತಿ ನೀಡಿದರು. ಇವರು ಶಿರಡಿಯಲ್ಲಿದ್ದ ಸಮಯದಲ್ಲಿ ಬೂಟಿವಾಡದ ನಿರ್ಮಾಣವಾಗುತ್ತಿತ್ತು. ಆ ಸಮಯದಲ್ಲಿ ದೊಡ್ಡ ಕಲ್ಲೊಂದು ಇವರ ತಲೆಗೆ ತಗುಲಿ ಪೆಟ್ಟಾಯಿತು. ಆಗ ಸಾಯಿಬಾಬಾರವರು ಇವರಿಗೆ ಔಷಧವನ್ನು ನೀಡಿ ತಲೆಯಲ್ಲಿ ಒಂದೂ ಕಲೆ ಸಹ ಇರದಂತೆ ಸಂಪೂರ್ಣ ಗುಣಪಡಿಸಿದರು. ತಲೆಗೆ ಕಲ್ಲಿನಿಂದ ಪಟ್ಟುಬಿದ್ದಾಗ ತಮಗೆ ಒಂದು ರೀತಿಯ ದಿವ್ಯ ಅನುಭವ ಹಾಗೂ ಅನುಭೂತಿಯಾಯಿತೆಂದು ವಾಮನ ರಾವ್ ನಂತರ ಹೇಳಿದರು. ಈ ಘಟನೆಯಾದ ನಂತರ ವಾಮನ ರಾವ್ ಸಾಯಿಬಾಬಾರವರ ಪರಮ ಭಕ್ತರಾಗಿ ರೂಪುಗೊಂಡರು. ಸಾಯಿಬಾಬಾರವರು ಧರಿಸುತ್ತಿದ್ದ ವಸ್ತ್ರಗಳಲ್ಲಿ ಅತೀವ ಶಕ್ತಿಯಿದ್ದಿತು. ಒಮ್ಮೆ ಬಾಬಾರವರು ತಾವು ಧರಿಸುತ್ತಿದ್ದ ಕಫ್ನಿಯನ್ನು ಮಹಾಳಸಾಪತಿಯವರಿಗೆ ಉಡುಗೊರೆಯಾಗಿ ನೀಡಿದರು. ಇದರಿಂದ ಮಹಾಳಸಾಪತಿಯವರು ತಮ್ಮ ಕೊನೆಗಾಲದವರೆಗೂ ಸನ್ಯಾಸಿಯಂತೆ ಜೀವನ ನಡೆಸಿದರು. ಆದರೆ, ಮನೆಯ ಹಾಗೂ ಸಾಮಾಜಿಕ ಜವಾಬ್ದಾರಿಯನ್ನು ಸಹ ಅಷ್ಟೇ ಸಮರ್ಥವಾಗಿ ನಿಭಾಯಿಸಿದರು. ಇನ್ನೊಮ್ಮೆ ಸಾಯಿಬಾಬಾರವರು ಮುಕ್ತಾರಾಂ ಎಂಬ ಭಕ್ತರಿಗೆ ತಮ್ಮ ಕಫ್ನಿಯನ್ನು ಉಡುಗೊರೆಯಾಗಿ ನೀಡಿದರು. ಕೊಳೆಯಾಗಿದ್ದ ಕಾರಣ ಮುಕ್ತಾರಾಂ ಆ ಕಫ್ನಿಯನ್ನು ತೊಳೆದು ದೀಕ್ಷಿತವಾಡದಲ್ಲಿ ಅದನ್ನು ಒಣಗಲು ಹಾಕಿದ್ದರು. ನಂತರ ಮುಕ್ತಾರಾಂ ಬಾಬಾರವರ ದರ್ಶನಕ್ಕೆಂದು ಹೋದರು. ಆಗ ವಾಮನ ರಾವ್ ದೀಕ್ಷಿತವಾಡದಲ್ಲಿಯೇ ಇದ್ದರು. ಒಣಗಿ ಹಾಕಿದ್ದ ಆ ಕಫ್ನಿಯಿಂದ "ನೋಡು, ಮುಕ್ತಾರಾಂ ನನ್ನನ್ನು ಇಲ್ಲಿ ತಂದು ತಲೆಕೆಳಗು ಮಾಡಿ ತೂಗುಹಾಕಿದ್ದಾನೆ" ಎಂಬ ವಾಣಿಯನ್ನು ವಾಮನ ರಾವ್ ಕೇಳಿಸಿಕೊಂಡರು. ವಾಮನ ರಾವ್ ಕೂಡಲೇ ಆ ಕಫ್ನಿಯನ್ನು ತೆಗೆದು ತಾವೇ ಹಾಕಿಕೊಂಡುಬಿಟ್ಟರು. ನಂತರ, ವಾಮನ ರಾವ್ ದ್ವಾರಕಾಮಾಯಿ ಮಸೀದಿಗೆ ಬಾಬಾರವರ ದರ್ಶನಕ್ಕೆ ತೆರಳಿದರು.  ವಾಮನ ರಾವ್ ಕಫ್ನಿಯನ್ನು ಧರಿಸಿರುವುದನ್ನು ನೋಡಿದ ಬಾಬಾರವರು ಇವರ ಮೇಲೆ ಕೋಪಗೊಂಡರು. ಆದರೆ, ಮುಂದೆ ಒಂದು ದಿನ ವಾಮನ ರಾವ್ ಸಂತರಾಗುವುದನ್ನು ಅರಿತಿದ್ದ ಬಾಬಾರವರು ಅವರಿಗೆ ಏನೂ ಅನ್ನಲಿಲ್ಲ. ಈ ಘಟನೆಯಾದ ದಿನದಿಂದ ವಾಮನ ರಾವ್ ರವರ ಅಧ್ಯಾತ್ಮಿಕ ಉನ್ನತಿ ಪ್ರಾರಂಭವಾಯಿತು.

1917ನೇ ಇಸವಿ ಮಾರ್ಚ್ ನಲ್ಲಿ ಇವರು ಅಹಮದಾಬಾದ್ ನ ಮಾದರಿ ಪ್ರೌಢಶಾಲೆಯ ಮುಖ್ಯೋಪಾಧ್ಯಾಯರಾದರು ಮತ್ತು ಜನವರಿ 1921 ನೇ ಇಸವಿಯವರೆವಿಗೂ ಅದೇ ಹುದ್ದೆಯಲ್ಲಿ ಮುಂದುವರೆದರು. ನಂತರ ಅದೇ ವರ್ಷದಲ್ಲಿ ಮುಂಬೈಗೆ ಬಂದು ಗಂಗಾ ಅಂಡ್ ಸಯನಿ ಎಂಬ ಸಂಸ್ಥೆಯಲ್ಲಿ ಮುಖ್ಯ ನಿರ್ವಾಹಕ ಗುಮಾಸ್ತರಾಗಿ ಕಾರ್ಯ ನಿರ್ವಹಿಸಲು ಪ್ರಾರಂಭಿಸಿದರು.

ಒಮ್ಮೆ ಒಬ್ಬ ಭಕ್ತರು ಇವರಿಗೆ ಸಾಯಿಬಾಬಾರವರ ಪಾದುಕೆಗಳನ್ನು ನೀಡಿ ಸಾಯಿಬಾಬಾರವರು ಅದನ್ನು ಇವರ ಉಸ್ತುವಾರಿಗೆ ನೀಡುವಂತೆ ಆದೇಶ ನೀಡಿರುತ್ತಾರೆ ಎಂದು ಹೇಳಿದರು. ಪಾದುಕೆಗಳನ್ನು ಮೊದಲು ತೆಗೆದುಕೊಳ್ಳಲು ಇವರು ನಿರಾಕರಿಸಿದರು. ನಂತರ ಕೊನೆಗೆ ಅದನ್ನು ಸ್ವೀಕರಿಸಿ ಅಹಮದಾಬಾದ್ ನಲ್ಲಿ "ವಿಷ್ಣು ಧರ್ಮಾಲಯ" ಎಂಬ ಹೆಸರಿನಲ್ಲಿ ಸಾಯಿಬಾಬಾರವರ ಮಂದಿರವನ್ನು ನಿರ್ಮಿಸಿ ಅಲ್ಲಿ ಈ ಪಾದುಕೆಗಳನ್ನು ಪ್ರತಿಷ್ಟಾಪಿಸಿದರು. ಈಗಲೂ ಸಾವಿರಾರು ಭಕ್ತರು ಈ ಪಾದುಕೆಗಳ ದರ್ಶನವನ್ನು ಮಾಡುತ್ತಾ ಇದ್ದಾರೆ.

ಇವರು ಸಾಯಿಬಾಬಾರವರ ಬಗ್ಗೆ ಅನೇಕ ಪುಸ್ತಕಗಳನ್ನು ಗುಜರಾತಿ ಭಾಷೆಯಲ್ಲಿ ಬರೆದಿರುತ್ತಾರೆ. ಇವರು 1932 ನೇ ಇಸವಿಯಲ್ಲಿ "ಗುರುಸ್ಮೃತಿ" ಎಂಬ ಪುಸ್ತಕವನ್ನು ರಚಿಸಿದರು. 1946ನೇ ಇಸವಿಯಲ್ಲಿ ಸಾಯಿಬಾಬಾರವರ ಜೀವನವನ್ನು ಕುರಿತು ಗುಜರಾತಿ ಭಾಷೆಯಲ್ಲಿ "ಸಾಯಿಬಾಬಾ" ಎಂಬ ಪುಸ್ತಕವನ್ನು ರಚಿಸಿರುತ್ತಾರೆ. ಸಾಯಿಬಾಬಾರವರ ಆಶೀರ್ವಾದದಿಂದ 1952-1953 ನೇ ಇಸವಿಯಲ್ಲಿ ಡಾಕೋರ್ ನಲ್ಲಿ ಸನ್ಯಾಸವನ್ನು ವಿಧ್ಯುಕ್ತವಾಗಿ ಸ್ವೀಕರಿಸಿ ಅಂದಿನಿಂದ "ಸ್ವಾಮಿ ಸಾಯಿ ಶರಣಾನಂದ" ರೆಂದು ನಾಮಾಂಕಿತರಾದರು. 1961ನೇ ಇಸವಿಯಲ್ಲಿ ಆಂಗ್ಲ ಭಾಷೆಯಲ್ಲಿ "ಸಾಯಿಬಾಬಾ, ದಿ ಸೂಪರ್ ಮ್ಯಾನ್" ಎಂಬ ಪುಸ್ತಕವನ್ನು ರಚಿಸಿದರು.

ಸಾಯಿಬಾಬಾರವರ ಮಹಾಸಮಾಧಿಯಾಗಿ ಸರಿಯಾಗಿ 36 ವರ್ಷಗಳ ನಂತರ 7ನೇ ಅಕ್ಟೋಬರ್ 1954 ರ ಪವಿತ್ರ ವಿಜಯದಶಮಿಯ ದಿನದಂದು ಶಿರಡಿಯ ಸಮಾಧಿ ಮಂದಿರದಲ್ಲಿ ಪ್ರಖ್ಯಾತ ಶಿಲ್ಪಿ ಹಾಗೂ ಸಾಯಿ ಮಹಾಭಕ್ತ ದಿವಂಗತ ಶ್ರೀ.ಬಾಲಾಜಿ ವಸಂತ ತಾಲೀಮ್ ರವರು ಕೆತ್ತನೆ ಮಾಡಿದ ಸಾಯಿಬಾಬಾರವರ ಸುಂದರ ಅಮೃತಶಿಲೆಯ ವಿಗ್ರಹವನ್ನು ಸ್ವಾಮಿ ಸಾಯಿ ಶರಣಾನಂದರು ಪ್ರತಿಷ್ಟಾಪನೆ ಮಾಡಿದರು.

ಸ್ವಾಮಿ ಶರಣಾನಂದರು ಅಹಮದಾಬಾದ್ ನಲ್ಲಿ ಸ್ಥಾಪಿಸಿರುವ "ವಿಷ್ಣು ಧರ್ಮಾಲಯ" ಸಾಯಿ ಮಂದಿರಕ್ಕೆ ದರ್ಶನಕ್ಕೆಂದು ದೇಶ ವಿದೇಶಗಳಿಂದ ಭಕ್ತರು ಸಾವಿರಾರು ಸಂಖ್ಯೆಯಲ್ಲಿ ಬರುತ್ತಾರೆ. 

ಹಲವಾರು ವರ್ಷಗಳು ಸಾಯಿಬಾಬಾ ಹಾಗೂ ಸಾಯಿ ಭಕ್ತರ ನಿಸ್ವಾರ್ಥ ಸೇವೆಯನ್ನು ಮಾಡಿದ ನಂತರ 25ನೇ ಆಗಸ್ಟ್ 1982 ರಂದು ತಮ್ಮ 93ನೇ ವಯಸ್ಸಿನಲ್ಲಿ ಸ್ವಾಮಿ ಸಾಯಿ ಶರಣಾನಂದರು ಸಾಯಿಬಾಬಾರವರ ಪಾದಕಮಲಗಳಲ್ಲಿ ಲೀನವಾದರು.

ಸ್ವಾಮಿ ಸಾಯಿ ಶರಣಾನಂದ ರವರ ಸಮಾಧಿ ಮಂದಿರವು ಗುಜರಾತ್ ರಾಜ್ಯದ ಅಹಮದಾಬಾದ್ ನ ಈ ಕೆಳಕಂಡ ವಿಳಾಸದಲ್ಲಿರುತ್ತದೆ:

ಸ್ವಾಮಿ ಸಾಯಿ ಶರಣಾನಂದ ಸಮಾಧಿ ಮಂದಿರ
ಶ್ರೀಮತಿ.ಉಷಾ ಬೆನ್ ಭಟ್ ಹಾಗೂ ಶ್ರೀ.ಪ್ರತೀಕ್ ಎಂ.ತ್ರಿವೇದಿ,
14/15, ಪ್ರಾಕೃತ್ ಕುಂಜ್ ಸೊಸೈಟಿ,
ನ್ಯೂ ಶರದ್ ಮಂದಿರ ರಸ್ತೆ,
ಬುಡೇರ್ ಪುರ ರಸ್ತೆ,
ಶ್ರೇಯಸ್ ಪ್ರೌಢಶಾಲೆ ಎದುರುಗಡೆ,
ಅಹಮದಾಬಾದ್ - 380 015,
ಗುಜರಾತ್, ಭಾರತ
ದೂರವಾಣಿ ಸಂಖ್ಯೆ; +91 79 2663 0118

ಕನ್ನಡ ಅನುವಾದ: ಶ್ರೀಕಂಠ ಶರ್ಮ

ರಾಜಸ್ತಾನದ ಶಿರಡಿ ಸಾಯಿಬಾಬಾ ಮಂದಿರ- ಶ್ರೀ ಶಿರಡಿ ಸಾಯಿ ಸೇವಾ ಸಮಿತಿ,ಘರ್ ಪ್ಯಾಲೇಸ್, ತಿಪ್ಟಾ, ಕೋಟಾ-324 006, ರಾಜಸ್ತಾನ, ಭಾರತ -  ಕೃಪೆ: ಸಾಯಿಅಮೃತಧಾರಾ.ಕಾಂ

ದೇವಾಲಯದ ವಿಶೇಷತೆಗಳು:

ಈ ದೇವಾಲಯವು ರಾಜಸ್ತಾನ ರಾಜ್ಯದ ಕೋಟಾ ನಗರದ ಘರ್ ಪ್ಯಾಲೇಸ್ ತಿಪ್ಟಾದ ಪಕ್ಕದಲ್ಲಿ ಇರುತ್ತದೆ.

ದೇವಾಲಯದ ಉದ್ಘಾಟನೆಯನ್ನು 15ನೇ ಆಗಸ್ಟ್ ರಂದು ದೇವಾಲಯದ ಆಡಳಿತ ಮಂಡಳಿಯ ಸದಸ್ಯರು ಸಾವಿರಾರು ಸ್ಥಳೀಯ ಸಾಯಿಭಕ್ತರ ಸಮ್ಮುಖದಲ್ಲಿ ನೆರವೇರಿಸಿರುತ್ತಾರೆ.

ದೇವಾಲಯದ ಟ್ರಸ್ಟ್ ದಿನನಿತ್ಯದ ಆಗುಹೋಗುಗಳನ್ನು ಮತ್ತು ಅಭಿವೃದ್ಧಿ ಕಾರ್ಯಗಳನ್ನು ಬಹಳ  ಅಚ್ಚುಕಟ್ಟಾಗಿ ನೋಡಿಕೊಳ್ಳುತ್ತಿದೆ. 

ದೇವಾಲಯದ ಗರ್ಭಗುಡಿಯಲ್ಲಿ ಸುಂದರ ಅಮೃತಶಿಲೆಯ ಸಾಯಿಬಾಬಾರವರ ವಿಗ್ರಹವನ್ನು ಪ್ರತಿಷ್ಟಾಪಿಸಲಾಗಿದೆ.

ದೇವಾಲಯದ ಕಾರ್ಯಚಟುವಟಿಕೆಗಳು:

ದಿನನಿತ್ಯದ ಕಾರ್ಯಕ್ರಮಗಳು:

ದೇವಾಲಯದ ಸಮಯ:

ಬೆಳಿಗ್ಗೆ 4:15 ರಿಂದ ರಾತ್ರಿ 11:00 ರವರೆಗೆ.

ಆರತಿಯ ಸಮಯ:

ಕಾಕಡಾ ಆರತಿ          : ಬೆಳಿಗ್ಗೆ 4:30 ಗಂಟೆಗೆ.
ಮಧ್ಯಾನ್ಹ ಆರತಿ         : ಮಧ್ಯಾನ್ಹ 12:00 ಗಂಟೆಗೆ
ಧೂಪಾರತಿ               : ಸಂಜೆ 6:00 ಗಂಟೆಗೆ.
ಶೇಜಾರತಿ                : ರಾತ್ರಿ 10:30 ಗಂಟೆಗೆ.

ವಿಶೇಷ ಉತ್ಸವದ ದಿನಗಳು:

ಪ್ರತಿವರ್ಷ 15ನೇ ಆಗಸ್ಟ್ ದೇವಾಲಯದ ವಾರ್ಷಿಕೋತ್ಸವ.
ಗುರುಪೂರ್ಣಿಮೆ.
ವಸಂತ ಪಂಚಮಿ ಮಹೋತ್ಸವ.

ದೇವಾಲಯದ ಸಾಮಾಜಿಕ ಕಾರ್ಯಚಟುವಟಿಕೆಗಳು:

ದೇವಾಲಯಕ್ಕೆ  ಬರುವ ಎಲ್ಲಾ ಸಾಯಿ ಭಕ್ತರಿಗೆ ಪ್ರತಿ ಗುರುವಾರದಂದು ಮಹಾಪ್ರಸಾದದ ವಿತರಣೆಯನ್ನು ಮಾಡಲಾಗುತ್ತಿದೆ.


ದೇವಾಲಯದ ವಿಳಾಸ ಮತ್ತು ಮಾರ್ಗಸೂಚಿ:


ಸ್ಥಳ:
ದೇವಾಲಯವು ಕೋಟಾ ನಗರದ ಘರ್ ಪ್ಯಾಲೇಸ್ ತಿಪ್ಟಾದ ಪಕ್ಕದಲ್ಲಿ ಇರುತ್ತದೆ.

ವಿಳಾಸ:
ಶ್ರೀ ಶಿರಡಿ ಸಾಯಿ ಸೇವಾ ಸಮಿತಿ,
ಘರ್ ಪ್ಯಾಲೇಸ್, ತಿಪ್ಟಾ,
ಕೋಟಾ-324 006,
ರಾಜಸ್ತಾನ, ಭಾರತ

ಸಂಪರ್ಕಿಸಬೇಕಾದ ವ್ಯಕ್ತಿಗಳು:
ಶ್ರೀ.ಯೋಗೇಶ್ ಪಂಚಡಿ/ಶ್ರೀ.ಚಂದ್ರ ಪ್ರಕಾಶ್ ಜೇಠಿ/ಶ್ರೀ.ಹೀರಾಲಾಲ್ ರೋಹಿಡಾ/ಶ್ರೀ.ರಾಜೇಂದ್ರ ಗೋರಸ್

ದೂರವಾಣಿ ಸಂಖ್ಯೆಗಳು :
+91 92143 34103/+91 93516 56223/+91 94147 65338/+91 94141 86985

ಇ ಮೇಲ್ ವಿಳಾಸ: 
saikripaassociate.22985@gmail.com


ಮಾರ್ಗಸೂಚಿ: 
ದೇವಾಲಯವು ಕೋಟಾ ನಗರದ ಘರ್ ಪ್ಯಾಲೇಸ್ ತಿಪ್ಟಾದ ಪಕ್ಕದಲ್ಲಿ ಇರುತ್ತದೆ.

ಕನ್ನಡ ಅನುವಾದ: ಶ್ರೀಕಂಠ ಶರ್ಮ

ತೆಲುಗು ಶ್ರೀ ಸಾಯಿ ಸಚ್ಚರಿತ್ರೆಯ ಹರಿಕಾರ ದಿವಂಗತ ಶ್ರೀ ಪ್ರತ್ತಿ ನಾರಾಯಣ ರಾವ್ - ಕೃಪೆ: ಸಾಯಿಅಮೃತಧಾರಾ.ಕಾಂ

ದಿವಂಗತ ಶ್ರೀ ಪ್ರತ್ತಿ ನಾರಾಯಣ ರಾವ್ ರವರು ಹೇಮಾಡಪಂತರ ಮರಾಠಿ ಸಾಯಿ ಸಚ್ಚರಿತ್ರೆಯನ್ನು ಆಂಗ್ಲ ಭಾಷೆಗೆ ಅನುವಾದ ಮಾಡಿದ ದಿವಂಗತ ಶ್ರೀ.ಗುಣಾಜಿಯವರ "ಶ್ರೀ ಸಾಯಿ ಸಚ್ಚರಿತ್ರೆ"ಯನ್ನು ತೆಲುಗು ಭಾಷೆಗೆ ಅನುವಾದ ಮಾಡುವ ಮುಖಾಂತರ  ಶಿರಡಿ ಸಾಯಿಬಾಬಾರವರ ಸಾಹಿತ್ಯ ಲೋಕದಲ್ಲಿ ಅಮರರಾಗಿದ್ದಾರೆ. ಇನ್ನೂ ಹೆಚ್ಚಿಗೆ ಹೇಳಬೇಕೆಂದರೆ ಈ ಗ್ರಂಥವು ಸಾಯಿಬಾಬಾರವರ ಬಗ್ಗೆ ರಚಿತವಾದ ಪ್ರಥಮ ತೆಲುಗು ಗ್ರಂಥವಾಗಿದ್ದು ಸಾಯಿ ಸಾಹಿತ್ಯವೆನ್ನುವ ತಾರಾಲೋಕದಲ್ಲಿ ಗ್ರಹಣವೇ ಹಿಡಿಯದ ಸೂರ್ಯನಂತೆ ರಾರಾಜಿಸುತ್ತಿದೆ ಎಂದರೆ ಅತಿಶಯೋಕ್ತಿಯಲ್ಲ. ಶ್ರೀ ಪ್ರತ್ತಿ ನಾರಾಯಣ ರಾವ್ ರವರ ಬಗ್ಗೆ ನಮ್ಮ ಬಳಿ ಹೆಚ್ಚಿನ ಮಾಹಿತಿ ಲಭ್ಯವಿರುವುದಿಲ್ಲ. ಶ್ರೀ ಪ್ರತ್ತಿ ನಾರಾಯಣ ರಾವ್ ರವರೇ ಸ್ವತಃ ತಮ್ಮ ತೆಲುಗು ಸಾಯಿ ಸಚ್ಚರಿತ್ರೆಯ ಮುನ್ನುಡಿಯಲ್ಲಿ "ಗುಬ್ಬಿಯ ಕಾಲಿಗೆ ದಾರ ಕಟ್ಟಿ ಎಳೆಯುವಂತೆ, ಸಾಯಿಬಾಬಾರವರು ತಮ್ಮನ್ನು ಪಶ್ಚಿಮ ತೀರದಿಂದ ಪೂರ್ವ ತೀರಕ್ಕೆ ತಮ್ಮೆಡೆಗೆ ಸೆಳೆದುಕೊಂಡರು" ಎಂದು ಹೇಳಿರುವುದು ಬಹಳ ಅರ್ಥಗರ್ಭಿತವಾದ ಉಕ್ತಿಯಾಗಿರುತ್ತದೆ.

ಶ್ರೀ ಪ್ರತ್ತಿ ನಾರಾಯಣ ರಾವ್ ರವರು ಆಂಧ್ರಪ್ರದೇಶದ ಶ್ರೀಕಾಕುಳಂ ಜಿಲ್ಲೆಯ ಇಚ್ಚಾಪುರಂ ಎಂಬ ಪಟ್ಟಣದಲ್ಲಿ ವೈಶ್ಯ ಮನೆತನದಲ್ಲಿ ಜನಿಸಿದರು. ಇವರ ತಾಯಿ ಶ್ರೀಮತಿ.ಪ್ರತ್ತಿ ರಾಮರತ್ನಂ ಹಾಗೂ ತಂದೆ ಶ್ರೀ.ಪ್ರತ್ತಿ ಕಾಮಯ್ಯ. ಇವರಿಗೆ ಒಬ್ಬ ಸಹೋದರ ಹಾಗೂ ಒಬ್ಬ ಸಹೋದರಿಯರಿದ್ದರು. ಇವರು ತಮ್ಮ ಜೀವನೋಪಾಯಕ್ಕೋಸ್ಕರವಾಗಿ ವಿಜಯನಗರಂ ಗೆ ವಲಸೆ ಹೋಗಿ ಅಲ್ಲಿ ಒಂದು ಟ್ಯುಟೋರಿಯಲ್ ಕಾಲೇಜ್ ಪ್ರಾರಂಭಿಸಿ ಪಾಠವನ್ನು ಹೇಳಿಕೊಡಲು ಪ್ರಾರಂಭಿಸಿದರು. ಇವರಿಗೆ ಇಬ್ಬರು ಗಂಡು ಮಕ್ಕಳಿದ್ದರು. ಇವರ ದೊಡ್ಡ ಮಗನಾದ ಶ್ರೀ.ಪ್ರತ್ತಿ ಸತ್ಯನಾರಾಯಣ ವಿಜಯನಗರಂ ನಲ್ಲಿ ಶಾಲಾ ಶಿಕ್ಷಕರಾಗಿ ಸೇವೆಯನ್ನು ಸಲ್ಲಿಸುತ್ತಿದ್ದರು; ಹಾಗೂ ಇವರ ಚಿಕ್ಕ ಮಗನಾದ ದಿವಂಗತ ಶ್ರೀ.ಪ್ರತ್ತಿ ಕೃಷ್ಣರಾವ್ ರವರು ಭಿಲಾಯ್ ನ ಉಕ್ಕು ಕಾರ್ಖಾನೆಯಲ್ಲಿ ಇಂಜಿನೀಯರ್ ಆಗಿ ಸೇವೆಯನ್ನು ಸಲ್ಲಿಸುತ್ತಿದ್ದರು.

ಇವರ ಮಗನು ಕೇವಲ ಐದು ವರ್ಷದವನಾಗಿದ್ದಾಗ, ಜೀವನದ ಮೇಲೆ ಜಿಗುಪ್ಸೆ ಬಂದು ಶ್ರೀ.ಪ್ರತ್ತಿ ನಾರಾಯಣ ರಾವ್ ರವರು ಮನೆಯನ್ನು ಬಿಟ್ಟು ಸತ್ಯದ ಶೋಧನೆಗಾಗಿ ಹೊರಟರು. ಕೊನೆಗೆ ಇವರು ಶಿರಡಿಗೆ ಬಂದು ಶಿರಡಿಯನ್ನೇ ತಮ್ಮ ಶಾಶ್ವತ ವಾಸ ಸ್ಥಾನವಾಗಿ ಮಾಡಿಕೊಂಡರೆಂದು ತಿಳಿದುಬಂದಿರುತ್ತದೆ. ಇವರು ಶಿರಡಿಯಲ್ಲಿ ಕಳೆದ ಕೆಲವು ದಿನಗಳ ಮಾಹಿತಿಗಳು ಇವರನ್ನು 1950ನೇ ಇಸವಿಯಲ್ಲಿ ಭೇಟಿ ಮಾಡಿದ ಪ್ರಖ್ಯಾತ ಸಾಯಿಭಕ್ತರಾದ ದಿವಂಗತ ಶ್ರೀ.ಶಿವನೇಶನ್ ಸ್ವಾಮೀಜಿಯವರಿಂದ ನಮಗೆ ಲಭ್ಯವಾಗಿರುತ್ತದೆ. ಸುಮಾರು ಒಂದೂವರೆ ತಿಂಗಳುಗಳ ಕಾಲ ಈ ಇಬ್ಬರೂ ಮಹಾ ಭಕ್ತರು ಚಾವಡಿಯಲ್ಲಿ ಭೇಟಿಯಾಗಿ ಸಾಯಿಬಾಬಾರವರ ಬಗ್ಗೆ ಧೀರ್ಘಕಾಲ ಸಮಾಲೋಚನೆ ನಡೆಸುತ್ತಿದ್ದರು. ಶ್ರೀ ಪ್ರತ್ತಿ ನಾರಾಯಣ ರಾವ್ ರವರು ಪ್ರತಿ ದಿನ ಚಾವಡಿಯಲ್ಲಿ ಕುಳಿತು ಪವಿತ್ರ ಶ್ರೀ ಸಾಯಿ ಸಚ್ಚರಿತ್ರೆಯ ಅನುವಾದ ಮಾಡುತ್ತಿದ್ದರು ಎಂದು ಶ್ರೀ ಶಿವನೇಶನ್ ಸ್ವಾಮೀಜಿಯವರು ಹೇಳುತ್ತಾರೆ.ಕೆಲವು ದಿನ ಒಂದು ಅಧ್ಯಾಯಕ್ಕಿಂತ ಹೆಚ್ಚು ಅನುವಾದ ಮಾಡುತ್ತಿದ್ದರೆಂದು ತಿಳಿದುಬಂದಿರುತ್ತದೆ. ಆದ ಕಾರಣ, ಶ್ರೀ ಪ್ರತ್ತಿ ನಾರಾಯಣ ರಾವ್ ರವರು ಕೇವಲ 40 ದಿನಗಳಲ್ಲಿ ಸಂಪೂರ್ಣ ಸಾಯಿ ಸಚ್ಚರಿತ್ರೆಯನ್ನು ಅನುವಾದ ಮಾಡಿರುವುದು ಒಂದು ದಾಖಲೆಯೆಂದೇ ಹೇಳಬಹುದು.

ಅನುವಾದ ಪೂರ್ಣಗೊಳಿಸಿದ ನಂತರ ಹೇಮಾಡಪಂತರು ತಮ್ಮನ್ನು ತಾವು ಶುಚಿಗೊಳಿಸಿಕೊಳ್ಳಲು "ಸಾಯಿನಾಮ ಜಪ" ವನ್ನು ಮಾಡಿದಂತೆ ಶ್ರೀ ಪ್ರತ್ತಿ ನಾರಾಯಣ ರಾವ್ ರವರು ಸಹ ಅದೇ ಪದ್ಧತಿಯನ್ನು ಅನುಸರಿಸಿ 3 ಕೋಟಿ ಸಾಯಿನಾಮ ಜಪವನ್ನು ಮಾಡಿ ಪೂರ್ಣಗೊಳಿಸಿ ನಂತರ ತೆಲುಗು ಸಾಯಿ ಸಚ್ಚರಿತ್ರೆಯನ್ನು ಮುದ್ರಣ ಮಾಡಿಸಿದರು. ಮುದ್ರಣ ಪೂರ್ಣವಾದ ನಂತರ ಪವಿತ್ರ ತೀರ್ಥಕ್ಷೇತ್ರಗಳಾದ ಕಾಶಿ, ಕೊಲ್ಹಾಪುರ, ಕರ್ನೂಲ್, ಮಹೂರಘಡ, ಕುರುವಪುರ, ಗಾಣಗಾಪುರ, ಹುಮ್ನಾಬಾದ್, ಅಕ್ಕಲಕೋಟೆ, ಶಿರಡಿ, ಸೋಮನಾಥ, ಶ್ರೀಶೈಲ, ಉಜ್ಜಯಿನಿ, ಮಹಾಬಲೇಶ್ವರ, ಪರಲಿ, ಡಾಕಿಣಿ, ರಾಮೇಶ್ವರ, ಔಂದ್, ತ್ರಯಂಬಕೇಶ್ವರ, ಘೃಷ್ಮೇಶ್ವರ, ಜುನಾಗಢ, ಭದ್ರಾಚಲ, ದ್ವಾರಕಾ, ಪಂಢರಾಪುರ, ವೇಮಪಲ್ಲಿ, ಪುರಿ, ತಿರುಪತಿ, ಶ್ರೀರಂಗ ಮತ್ತು ತಿರುವನಂತಪುರ ಗಳಿಗೆ ತೆರಳಿ ಅಲ್ಲಿ ಆ ಪವಿತ್ರ ಗ್ರಂಥವನ್ನು ಸ್ವಯಂ ಪಾರಾಯಣ ಮಾಡಿದರು.

ನಂತರ, 19ನೇ ಮೇ 1953 ರಂದು ತೆಲುಗು ಸಾಯಿ ಸಚ್ಚರಿತ್ರೆಯ ಮೊದಲ ಮುದ್ರಣವನ್ನು ಲೋಕಾರ್ಪಣೆ ಮಾಡಿದರು. ಅಷ್ಟೇ ಅಲ್ಲದೇ, ಆಂಧ್ರಪ್ರದೇಶದಾದ್ಯಂತ ಸಂಚರಿಸಿ ತೆಲುಗು ಭಾಷೆಯಲ್ಲಿ ಸಾಯಿಬಾಬಾರವರ ಬಗ್ಗೆ ಪ್ರವಚನಗಳನ್ನು ನೀಡುತ್ತಾ ತಮ್ಮದೇ ಆದ ರೀತಿಯಲ್ಲಿ ಸಾಯಿ ಪ್ರಚಾರವನ್ನು ಮಾಡಿದರು.

ಹೀಗೆ ಸಾಯಿ ಪ್ರಚಾರವನ್ನು ಮಾಡುತ್ತಾ ಶ್ರೀ ಪ್ರತ್ತಿ ನಾರಾಯಣ ರಾವ್ ರವರು ಸಮಾಧಿಸ್ಥರಾದರು. ಅವರು ಸಮಾಧಿಯಾದ ದಿನದ ಬಗ್ಗೆ ಕೂಡ ಖಚಿತ ಮಾಹಿತಿ ಲಭ್ಯವಿರುವುದಿಲ್ಲ. ಅವರ ಅಂತಿಮ ಸಂಸ್ಕಾರವನ್ನು ಸಾಯಿಬಂಧುಗಳೆಲ್ಲರೂ ಸೇರಿ ಬಹಳ ಅರ್ಥಪೂರ್ಣವಾಗಿ ಮಾಡಿದರೆಂದು ಮಾತ್ರ ತಿಳಿದುಬಂದಿರುತ್ತದೆ.

ಕನ್ನಡ ಅನುವಾದ: ಶ್ರೀಕಂಠ ಶರ್ಮ